قصيدة للمرحوم ملا عبود الكرخي كتب هذه القصيدة گبل ٧١ سنة

قيم الرگاع من ديرةعفچ♦

قصيدة للمرحوم ملا عبود الكرخي كتب هذه القصيدة گبل ٧١ سنة و عبالك كاتبهه هذي اﻷيام
كتبهه ايام الملكية لما كان عبد الإله وصي على عرش العراق أيام الإحتلال البريطاني
☆☆☆☆☆☆☆☆
قيم الرگاع من هاي اللحه
تشوفه هيبة وعنده لحيةمسرحة
يشتم بلا خجل و بلا مستحه
من يحس المقعد شويه اندحچ
قيم الرگاع من ديرة عفچ
☆☆☆☆☆☆☆☆
پرلمان اهل المحابس و المدس
عگب ما چانوا يدورون الفلس
هسه هم يرتشي و هم يختلس
و لونقص من راتبه سنت انعقچ
قيم الرگاع من ديرة عفچ
☆☆☆☆☆☆☆
تشوف واحدهم معگل بالوقار
و بالأصل تاريخه أسود كله عار
بضرف ثلث سنين مليونير صار
يريد عالوادم يعبرله چلچ
قيم الرگاع من ديرة عفچ
☆☆☆☆☆☆☆
گمت ما أعرف حماها من الرجل
يا هو التكضه اهو يمثل العدل
و گمنه نستوردالشلغم والفجل
لأن كلها ظلت اتدور ودچ
قيم الرگاع من ديرة عفچ
☆☆☆☆☆☆☆
و الله ضيعنه الصدگ من الچذب
تشوفه هيبه و حچيه المصفط عذب
ياخذك و يردك بشرق و غرب
و بسچاچينه يدچك حيل دچ
قيم الرگاع من د يرة عفچ
☆☆☆☆☆☆☆
حيل دوخني الحچي الماله ربط
و صارعندي سكروحصبه وضغط
نفترش عاگول و نتغطه ابحسچ
قيم الرگاع من ديرة عفچ
☆☆☆☆☆☆☆
گمت ما اميز الذيب امن الحمل
امنين ما ألتفت گلبي يشتعل
ءانه ما شايف شعب يتبع خبل
شاب راسي و تيهت كل السچچ
قيم الرگاع من ديرة عفچ
☆☆☆☆☆☆
يا حكومتنه الرشيده أم الوقار
الفساد المالي عنوان الچ صار
ندري جابوكم ابدبابه و قطار
ليش ضليتوا سمچ ياكل سمچ
قيم الرگاع من ديرة عفچ
☆☆☆☆☆☆
لازم انميز الزين امن الزلم
و ننتخب كلمن شهم صاحب علم
و نرفض اللي يجي كل يوم ابفلم
من يشوف المنصب شويه اندرچ
قيم الرگاع من ديرةعفچ